PARMA Fc. Anno 2007/2008 - Pagelle In Dialetto

[small faces]

02/12/2007 Parma-Empoli 1-0




Luca sèt: se Dio vôl t’è sarnì al santväri giùsst…in cò na gran paräda al primm temp, e in t’al sgònd trì o quoto bàli fòra d’un dìd… potènsa d’il benedisò;

Col’ly sìnc: s’an fìss parchè dòpa a g’ha da zugär Dino, chilù a’l vrìss spedì subìt a fèr al pròvi da Re Magio in t’un quälc presepe fin’a Nadäl;

Falcò sèz: da sgrizôr ogni balòn c’al tòca, però l’è na cuälca fèsta cl’è drè a madurär, a’s vèda cl’è na varietä tardiva;

Paci òt: al granatièr l’è drè a incuadrär la porta... e con l’altèza c’al g’ha… che quand’al ven zò a’l g’ha al ciùff con la rozäda, par ch’j ätor l’è dura rivär fin lasù!!! Avanti acsì!!!;

Castlè sìnc: oh Pavlèn sit pasè da Piazäl Picèli stamaten’na… no parchè l’èra tutt’un blizgär e a la fèn te’t si fat anca mäl porco d’un mond…sperèma bèn dai in bocca al lupo!!!;

Morrò òt: al novantèsim l’ha recuperè tri volti la bala in t’un minùd… na volta indrè, na volta a metè camp na volta là d’nanz… semplicement mostruos!!! N’esempi par tutt!!!;

Cigarèn sèt: sempär lucidìssim elegant c’me al solit, anca grintòz, al nostär Pirlèn… ca n’è miga n’ofèsa in col cäs chi;

Gasbaròn sìnc: oh yeti, co fèt a’t zôgh bèn contra i gôb e basta? A’n vrìss miga c’at fìss a drè a ciapèr l’andiamo äd Mimmo parchè a’g n’è basta äd vòn;

Pisanu sèt: dopa trì minùd e trì bali sbagliädi la diagnosi l’èra.. giornäda storta…inveci l’è stè vòn di mjôr, corsa e vòja äd vènsär fin’in fònda!!! Bravo!!!;

Reginaldo sìnc: c’me braziliàn a’l dovrìss ìssor geniäl, mo àd geniäl a’l g’ha la mole d’al genio äd la lampada… a’g manca che la còva e il scärpi a la l’insù;

Corradi òt: con Bernärd a’s pòl mètär su un dìsc… tra l’ätor second mi se coj davanti ì magìsson la foja… ì’s podrìsson fiacär äd fär di gol a zughär a taca a chilù;

MimmoDiCarlo sèt: par via äd la teroia äd Napoleòn wè Shrek!!! D’ätra pärta par so quanti fèsti la fortòn’na a’t l’è gnanca vista in cartolen’na…ansi… tèn’la strìca incò cl’è pasäda…c’ag vòl anca còla lì… e dagh d’al coràgg a chi ragàs lì vamolà;

Tifòz sìnc: fiac e grìz c’me la stagiòn… a gnìra anca i moment mjôr

[small faces]

9/12/2007 Napoli-Parma 1-0



Luca sèz: anca stasìra un tir un gol, asolutament imparabil;

Zenòn sèz: dato c’al g’ha da zugär ancòrra un pèr äd partidi a’g dag un vot in fiducia, ne’s sa mäj c’al pòsa portär forton’na;

Falcò sèz: purtròp l’ha fat gol al centravanti, sionò l’èra un bèl nòv, l’è drè a fnìr al rodàg;

Paci sèz: invisìbil, pa vòn äd dù mètär l’è n’impresa, mo l’ha fat d’vintär invisibil anca j’atacant elòra la suficènsa…la’g sta;

Col’ly sèt: bèl codìggn, avant’indrè tuta la partìda, un pär äd salvatàg ecesionäl, a’l sé drè à arciapär al re magio chi;

Parravicini sìnc: al Parra äd l’an pasè l’è un miràgg ancòrra, tìmid c’me un ragasòt, strajè c’me la pòra, imprecis inconcludent, sensa inìzi e sensa fèn;

Dessena quator: a’t savìss Daniele c’me a’m dispiäs där di quator a un pramzàn, mo dìm ti c’me a’s fa a därot la suficènsa c’at zôgh do bali in t’na partìda e c’me minim vùna a’t la dè a lòr?;

Mariga òt: un bèc äd fèr c’me vòn äd trent’an, personalitè, catìvèria, e po’ na ghigna da fèr paura…Mimmo, par piazèr fàl zugär un po’ va là;

Pisanu sèz: vlontä da fèr paura, mo c’me concretèsa, lasèma pèrdor;

Reginaldo trì: còl gol a’l la fèva anca al Listo, al centratàcc äd la Pineta del Sole, che in tl’area picèn’na al ghe dä novanta pònt su sènt a chilù ( e adèsa a’l m’ha da pagär na sèn’na par c’la citasiòn chi );

Corradi sèz: un sèz politic, c’me da ch’indrè, mo incò gnenta äd pù lòmo…a’t si un po’ col pìli scàrghi in col periodo chi, n’è miga che c’la ragasa la si a Pärma un po’ tròp de spèss?;

MimmoDiCarlo sèz: a gh’è tochè fär pù cambi incò che in tut l’an, purtrop l’è stè un episodi e basta a condanäros, su al moräl che domenica l’è decisiva ancòrra a m’arc’mand Mimmo dai.

[small faces]

16/12/2007 Parma-Reggina 3-0




Luca dèz: un po’ par la paräda äd l’ultòm minüd, un po’ parchè stär in späda novanta minùd al frèd senza còrror ch’il do bräghi cürti chi pèron tirè fôra dai sàcc d’ì cièchi… a’g vòl un coragg da leòn;

Zenòn sèt: al vòt äd fiducia ca t’ho dè a Napoli l’ha portè i so frùtt, però al conträri äd Prodi te’t n’in sì miga aprofitè… e al gir dòpa t’è fat da tì…bèla partìda Dino… stavolta la màn a’t la strìcc mì;

Falcò òt: oh rapace… adèsa ca vèna al bèl, te’t sarè mig fat mèl par cäs ah, ca’s tòca portärot a la Lipu in t’ì Bosc äd Carèga;

Paci nòv: mimmodicarlo, a Gènva quand a gh’èra Barnärd squalifichè, a vräva fat zugär chilù da centratàc! La pônta äd scorta l’è col corazèr chi;

Col’ly sèt: äd solit ai zugadòr ca vèn dal continente nero i’g tiròn via dèz àn d’insìmma al pasaport ( Mbomà quand l’è rivè chi a’l g’äva sinquant’an ) a’s vèda che a chilù i’g j’han zontè parchè a pär c’al g’abia vintitrì an da tant’al và;

Moròn dèz: a’l g’ha n’andadùra ca pära c’al dàga zò da un moment a cl’ätor inveci davanti a lù a và zò tutt ch’j ätor! L’acvìsst äd l’àn, destinè à ìssor ricordè pr un sàc d’àn da ch’il pärti chì;

Cigarèn dèz: Toscanèn, Muti, chi c’sì äd diretòr d’orchèstra a’s n’intendämma un bel po’, e col ragass chi la batècca adèsa c’al se senta d’atòrna la fiducia, a’l dimostra äd saverla drovär da razòn, fin tròpp parchè a zùgnn a g’ho paura c’al pòsa fär il valìzi;

Gasbaròn sèt: con c’la mìssa da pastore serafino lì, a’t podrìss stär in t’un presepe anca tì sensa problèma, mo adèsa a’t sarvìss in camp, anca s’at fè sempär trì pàs in t’un quadrèl, però in cò a’t j’è imbäriaghè da razòn;

Pisanu dèz: ormäi l’è batzäda c’me la tò anäda, incò impresionant par tùtt, corsa, grènta, vòja, convinsiòn, concretèza, inseriment, sens d’al gòl… se Dio vòl a’s vèda col gionvòtt ca fäva fär la banchèn’na a Cassano in t’il giovanili! Ghiro a’g vòl fat firmär un contrat blindè a la svelten’na a col ragas chì!;

Reginaldo sèt: a’s n’è avù pr’a mäl parchè a’l l’ho paragonè al Listo, elora incò l’ha fat dù assist da Beto, n’ätor zugadòr d’al fòlbal romantic äd la Pineta, dù pè da Copacabana, mo cl’andäva in camp col bicèr in t’na màn e la sigarèta in cl’ätra;

Corradi òt: Barnärd, dato che i compliment j’en automatic tutt’il festi, al spàzi al dròv par d’mandärot in do a’t j’è catè chi ociäj lì, gh’èt da saldär un tòcc äd fèr?;

Mimmomorfeo zèro: anca s’an t’è miga zôghè, a’n voj savèr gnenta, mo nani sa ne’t fè miga d’al casèn a ne’t stè miga bèn, adèsa però ca gh’è na societè, i casinista ì g’han da fär fagòtt e andär da n’ätra pärta a fèr di dàn!;

MimmoDiCarlo nòv: onore al merito, Shrek se Dio vôl t’è catè al fil d’al discors? D’acordi che la Reggina la n’è miga al Real Madrid, mo gnanca al Siena e al Cagliari so quant festi indrè, elòra vôt bas ch’il volti lì, gran vôt stavolta! Adèsa Mimmo a vòl fat so quant pònt in trasferta, e sèma a post, a c’minsär da Gènva ch’j èn simpatic c’me un s’ciafòn a màn inversa.


E adesà tutt a Genova a festegiar al Nadal!!!!! Forza Crociati, gli unici, gli originali!!! Sperema ad vinsor dù a zero........ peta cma toc al balì!!!![/b]

[small faces]

22/12/2007 Genoa-Parma 1-0




Luca sèt: chi dù tìr chi t’han fat, a’t j’è anca ciapè, concentrè sicùr, sul rigor co vòt fèr d’ètra pärta; Bon Nadäl, Luca;

Zenòn sèz: si va bèn Dino mo a’t si miga a scòla ca te’t limit a fär al compitèn e basta! A’g vòl pù arogansa su par c’la fàscia lì;

Falcò nòv: al mjôr in camp, un gladiatòr, a’n s’è mäj tirè indrè d’un milimètor, na garansìà ded chi andèr in fònda;

Paci sìnc: l’è bèle al second rigor da nador, dopa col d’al Livorno, in serie A, specialment in sèrt camp, äd la prepotenza a’g n’è miga basta, a’g vòl d’la furbìssia a’l me gigànt;

Col’ly sèt: mèj che Dino, a’l perìcol a’l riva adèsa cl’andrà a cà, chilòr quand’i vàn a cà a ne’s sa mèj c’me i tòrnon indrè;

Moròn sèz: a’s vèda che a e fèn äd l’an l’ha catè pièn a fèr al colaudo, elòra jer l’andäva a trì, al carburadòr un po’ ingozè, invèci che al sòlit enduro jèr a’l paräva si e no un Garèli;

Cigarèn quator: trop compliment i fàn mèl vèra Toscanèn! Tena i pè par tèra gionvòt, che s’at dovìss andär a zugär pù in ält, te’t n’acorzarè cò vol dìr la presiòn, pèz che na brònza äd mnestròn;

Gasbaròn quàtor: ti è còl ca vèn dòpa andì avanti in societè, na partìda sì na partìda no! Al problèma l’è che a c’la manèra chi a’s zùga un po’ tròp de spèss in nôv elòra a vèn nòta bon’òra;

Pisanu sìnc: compàgn a Serafino chi su, al pèra in altalena, in cà un fenomeno, fòra l’ozlèn d’al frèd… dai nàni c’ag vol continuitè par fär la cariera c’at meriti, parchè a’t si un gran brèv ragàs prim’äd tùtt, à s’è vist anca da la fàcia c’at g’èv jèr al fìssc finäl;

Reginaldo dù: chilòr sòt’al fèsti ì tàcn’à sintìr la saudade elòra bòn’na nòt sonadòr; l’è tùt un balär, un pistär d’ìl gran pòcci, al problèma l’è che dopa rìva carneväl subìt, è l’an l’è bèle che fnì;

Corradi sèt: da lù c’me un càn la d’nanz, e c’me sempär un lotadòr da Colosseo; purtròp i so socio i’n l’han ancòrra capì, che basta andèr vòn da n apèrta e vòn da cl’ätra che la bala la riva e a’s va in bùza;

MimmoDiCarlo sìnc: miga pr’ätor mo fin ca ne’t tgnirè Cohiba in panca na cuàlca volta, chèra al me Mimmo a vòl dir che la sforton’na tet’la vè anca a sarcär no?

Arbitro zèro: ancòra? Ancòra? Mo a’s tòca vèdor ancòra sèrti vigliacädi? E lasèma lì äd dir ch’j èn eròr e basta, al Gènoa a’l gh’èva da vènsär e col vigliàc lì a’l g’ha pinsè lù, tant’ag sarà sèmpär chi jà difenda, anca sui nostär giornäl e il nostri televisiòn! Vargògna!

Borriello -10: da quanda a segui al zòg dal balon, no vest di zùgadòr sporc, tipo Pasquale Bruno e compagnia bèla.... ma chilù glia bàta tut.... tacagnien, sporc, malducat e antipatic c'me un calz in tal bali! na' vargogna!

Bon Nadäl e bòn’ni fèsti a tutt, anca a j’arzàn campiòn d’invèron, anca sa mi dirìss che là zò j’en pù che ätor campiòn d’inFèron

[small faces]

13/01/2008 Parma-Fiorentina 1-2




Luca cuàtor: in do j’èn stè fàt i tò gvànt Luca à la Permaflex? Cò gh’èvot dèntär d’il mòji c’an t’è miga tgnù strìcc un balòn che vòn;

Zenòn sèz: pian pianèn al s’è drè a drizèr chilù, al balòn d’or a’n la vensrà miga sicur, mò la pagnòta a’s l’è drè a gvadagnèr almeno col lì;

Falcò nòv: al Falco l’ha catè al cazadòr c’al g’ha tirè na s’cioptäda c’al l’ha tramortì, al vòt l’è par la sfortòn’na e pr’incoragiament;

Nando òt: che partìda ca t’è fat a’l me ciòmo! A te’m si drè a somigliär sempr’äd pù e miga par la ciòma e basta… di la vritä ca te’t si fat där na quälca casèta d’al Barbiàn dal carozèr par studiär da razòn i mè moviment;

Paci sèt: Vieri a’l n’ha miga fat un tir in porta, e lù gh’è manchè un pèl c’al sgnìss ancòrra in t’al prim temp, l’è drè a d’vintär na bèla sicurèssa;

Col’ly dù: a’g s’èra drè a där un sèt, po’ a j’ho lèt la sò solidarietä a Mutu, elòra c’as tèna al sò dù anca lù, c’al pènsa a zugär a balòn cl’èmmej;

Castlèn sèz: prìmm temp ecesionäl, da vòn cl’è stè operè jerdlà fin trop! Certo che se un cvalchidòn ätor a’l fìss profesionäl c’me col ragas chi… sensa fär di nòm;

Moròn cuàtor: al me ragàs che giornäda storta incò ah? A’t n’è fat pù tì che Bertoldo… nà stupidäda drè a cl’ätra, ma son sicur che domenia a milàn, a tornarà al sòlit gverièr;

Cigarèn cuàtor: t’è drè a girär la tèsta ah picèn? Barcellona, Milan, Giuvendus, Inter… mò arcòrdot che par rivär lasù a’t gh’è da zugär bèn chi c’sì… e bèn bombèn… e che a blizgär a’s fa prèstìsim;

Pisanu sìnc: eh tato, un vòt cl’è cvestiòn äd milimètär, se col päl lì a’l fìss andè dentär, trì vòt äd pù sensa discusiòn, però a’n t’è miga fat granchè incò, dai dai smaltìssa l’influènsa a la svelten’na su;

Reginaldo trì: l’è c’me al dollaro, a’s pensa sèmpär cl’abia tochè al fònd, invèci ogni volta a’l se svaluta sempr’äd pù ! andär a la fèn äd l’an a’s tocrà pagär nojètor par därol via;

Corradi sèz: pònta centräla l’ha sgarblè dozènt balòn, certo che prima che dolarèn a’l magna la fòja chèra al me Barnärd, a’t fè ora à ciapèr la pensiòn;

MimmoDiCarlo sìnc: oh Mimmo e dai na volta dai dù dai trì, dòpa la sforton’na d’j ùltom minùd la ne’s pòl pù ciamär sforton’na, anca se anca incò l’arbitràgg, a vrìss sintìr coj ca dìz che a la fèn äd l’an a’s fa sempär päri! Sì e cucù la fòla dal mago andì a contärla a cvälchidòn ätor bagolòn;

Prandèli dèz: un vòt par l’umanitä e la dignitä dimosträda in cvälsiasi sitvasiòn, adèsa però Cesare a’m spèt che s’ag pensa miga al giùdic sportìv a mètr’in castìg Mutu ( zèro par tùta la vìta, òcio bùlo che a Pèrma a gh’ämma la memoria lònga ), a te’g pènsi ti ! da un siòr c’me tì… a m’al spèt… parchè l’è stè ingiuriòs coj tò amigh äd Pärma, e’l vòl castighè!

[small faces]

20/01/2008 Inter - Parma 3-2




Luca dèz: partìma da Luca… cl’ha cambiè in gvànt äd Permaflex in gvànt äd vinavil!!! Sensa colpi;

Zenòn sèt: sempär mèj, adèsa anca pù sicur avtoritäri… Dino adèsa a sèma in discesa ded chi andär in fonda;

Nando òt: fin’à la vargògna d’al finäl il pònti äd l’inter in n’han gnanca fat un tir in porta! Vòn d’i mjòr, sfortunè pr’al päl e al rigòr, anca cazè fòra sensa colpi, la vitima nùmer vòn äd la prepotensa d’ì sòld;

Rossi nòv: al g’äva pù pònt lù in tèsta che la clasifica d’al Pärma, invèci l’ha fat na partìda strepitosa… un gverièr Crozè, un giòvon d’il nostri pärti da ìssor orgogliòs;

Casltè òt: na locomotiva, prepotent, a l’arembagg, a t’è bèle pasè tut in còl znòcc lì… un bèl lavor parchè a’t si propria un gran bel zugadòr;

Dessena òt: ooooohhhhhhhhh là Daniele se Dio vòl a’t pòs dèr al vòt ca preferìss, al Daniele äd Bològgna d’al sparègg, grintòz, catìv, paura äd nisòn ! a m’arcmand adèsa stà miga fär al fòg äd pàja, e chi schifos ca t’ha picè äd nascost, al ritòron tenja marchè in t’al blòc notes e daghja indrè tùtti;

Cigarèn sèt: un gran gol, ma poca sostansa pr’al rèst, a’g vòl äd la cativèria, äd l’ignoransa par dirla c’me al Ghiro;

Moròn sèt: a’t paräv vòn äd chi ragazòt d’al tèmp äd gvèra, d’i film in biànc e nìgor, gamben’ni sèchi c’me dò stanghi da polèr, a còrror a drè a tùtt, con j’occ da indemoniè… c’me prevìsst al coma l’è durè ‘na fèsta e basta;

Pisanu nòv: poc concrèt mo second mi l’ha fat s’ciopèr al contachilometri chilù, che ràza d’un còr che ràza äd na voja äd fär bèn, bravo nani, un gran bèl Crozè;

Reginaldo sèz: anca chilù c’me vlontè a’n se’g pòl dìr gnènta, mò a’l fa pù fumèra lù che còla ca gh’è fòra d’al f’nèstri in chi giòron chi;

Corèdi dèz: impresionant, contra la squèdra pù fisica d’al campionè, l’ha fat la gvèra con tùtt, a’l g’ha mìss còr, fìsic, sarvèl, garlètt, grènta tutt äd tùtt sensa mèj fèr un pàs indrè! Ghiro fèma miga l’eròr äd lasèrl’andär via a m’arcmand;

Gasbarò òt: na magia e n’asnäda, la magìa sens’ätor l’è städa pù bèla, mo sa ne’t fäv miga l’asnäda però a s’andäva sul trì a vòn e bon’na nòt sonadòr!

MimmoDiCarlo dèz: eh Mimmo lasèma perdär j’ultom sinc minùd äd ladrädi t’è preparè e fàt na partìda parfèta ! e po’ dì la vritä te’t si fat cazär fòra parchè domenica a gh’è Baldèn e na sèrta paura a te’g l’è dato che col là a’l sbàra c’me un mùl;

Arbitro e compagnia bèla zèro: Ghiro adèsa basta però ah ? Fèros sintìr… e da razòn parchè l’è vargògna! I’m fan sempär pù schifo, mò moralment, umanament, a mì la gènta ca fa la rufiana coj pù fort la m’ha sèmpär fat schifo... e chilòr nòv su dèz l’è genta acsì, basta gvardär la storia d’al calcio Italian!

Tifòz dèz: stavolta a’l dàg al vòt, parchè in tivù a’s sentiva sbrajèr pù coj d’al Pärma che chi quator mòrt äd frèd äd l’Inter… na bèla pròva c’me la squèdra… da Crozè, mò Cròzè da bòn, miga c’me l’Inter che tant c’la gh’èra la s’ha robè anca la Cròza!

[kaa]

che lol l'odio per reginaldo...
mi mancheranno il prossimo anno

[kaa]

BENTORNATI!

prossimo anno obbligatorie le pagelle

[vito]

un bello stadio in serie a bentornati!

[IV]

prossimo anno obbligatorie le pagelle

t'ammazzo!